27 ديسمبر 2010

العــــــــــــلم نورون

 شوف ياواد
فز قوم من
عا لكــــــــتاب
   *   *
قوم ودعبس
 في الدولاب
ياللا هات
شورت وفانلة
عايز اكسب
 فيك ثـــــواب
  *    *
وهجبلك كوتش 
  جامد 
لجل تلعب                                        
مع الشـــــباب
  *    *
انت فاكر 
بالمذاكرة
وبالشقي و سهر                              
الليالي
والعــــــــــــذاب
  *    * 
    
عمرها تحقق
طموحك
واللا هتخليك 
   ياواد
 تبقي بيه
يابني دا وهم
وســــــــــراب
  *   *
يوم ماتلعب                                           
ماتش جامد
تلقي اسمك
في الجرايد
يعملوك 
قدوة شـــباب
  *    *
يتعمل لك يابني 
قيمة 
وشغل سيما
وتبقي صاحب 
هيلمان ينفتحلك
الف بــــــــاب
   *   *    
وف دراستك
تبقي هايل
حد طايل
حد يجرؤ
 يكتبك
يابني غـــياب
  *   *  
والا اقوللك 
يابني رووح
لم لك شلة 
شـــــــــــــباب
  *   *
واعملوا شوية
اغاني 
دي فرانكو
ودي   اراب
  *   *
واللا غني 
اي حاجة 
للضني او
للهـــــــــباب
  *  *  
واللا غني 
للخضار
قول جوافة 
قول حمير 
قول معيز
او قول كلاب
   *   *
واما تعمل يوم
 كليب
حبذا لو  يبقي 
خارج 
عــــــــــــالاداب
  *   *
تبقي نجم يابني 
صاعد
وتروح لافراح
الاباعد
يلا تقبض بالدولار
والفلوس 
من غير حساب
  *   *
علم ايه
ودراسة ايه
حتي يابني
 اللي يذاكر
 واللا يتعب 
واللا ينجح 
لما يابني يوم
 يشوفك 
انت هتجيبلة
اكتــــــــــئاب                                          

العلم نورون

هناك 42 تعليقًا :

  1. انا عايز الحق اول تعليق مبدئيا
    وبعد كده الدنيا اتغيرت ومعدتش الناس زي زمان يقولوا فلان ده متعلم وابن مدارس بقت الدنيا فلان ده معاه فلوس ومشهور وفعلا بص في كام عالم في مصر نعرفه ونسمع اسمه وفي كام ممثل وكام مغني وكام لاعيب حتى الراقصات بيقولوا احنا شايلين رساله وبنتعب عشان نوصلها

    ردحذف
  2. eng_semsem
    بشمهندس
    تعليقك في اي مكان بينور المدونة
    الوضع المقلوب
    اللي خللي علمائنا العظام من اشهر
    العلماء في العالم
    وفي بلدهم لانعرف عنهم حاجة
    زمان كان طه حسين والعقاد
    ومصطفي مشرفة
    هم الاشهر
    وكانو بيقولوا علي الفنانين مشخصاتية
    دلوقتي خلاص
    تحياتي

    ردحذف
  3. اخي سواح
    بطالتي اصحاب الشواهد خلت الشباب ييأسو من المذاكرة والتعليم وحمى الكرة الي نتشرت خلتهم يشوفو فيها الخلاص
    موضوع مهم مقدم بشكل فكاهي جميل
    تسلم على هذا الابداع
    تحياتي

    ردحذف
  4. و كل ده عشان تطمن على مستقبله :)))

    عارف واحد ضابط مباحث امن دولة مسك طالب فى جامعه القاهرة من حركة سته ابريل و الجمعية الوطنية للتغيير و قاله بص يا واد روح امشيلك مع موزه و لا شوفلك حته حشيش و دلع نفسك انما ح تقولى تغيير و برادعى ح........ و مافيش داعى اقولك باقى كلامه ايه

    ردحذف
  5. المشخصاتى والفنان زمان كان غير معترف بية ولا يصلح شاهد فى القضايا يعنى كان ارجوز
    لكن دلوقتى بقى لية سعر وينفرش لة الارض رملة جاهل وامى وينضربلو تعظيم سلام
    ياعينى على العلماء والادياء والشعراء
    ماتو فقراء لانهم لا يعرفو الرقص ولا الغناء
    فى النهاية كلاماتك فى الصميم وجميلة جدا لانها تحمل معانى فيها سخرية على الحال اللى اصبح مقلوب
    واخيرا سيظل العلم نور رغم انف الجميع

    مبدع وفنان يا سواح

    ردحذف
  6. شهـــــرزاد
    ايها المبدعة
    فقد نجحوا في الهائنا عن قضايانا
    تحياتي ياشهرزاد

    ردحذف
  7. تـــــــيرز
    طبعا ابعد عن السياسة واعمل اللي
    انت عاوزة
    ورغم ده احنا شعوبنا ذكيه جدا
    بس لاحيلة لها
    عايزينا دائما عايشين في الجهل
    تحياتي ياتيرز

    ردحذف
  8. هــــــبة فاروق
    عاجبني فيكي اختي الفاضلة
    تمسكك بقيمة العلم
    ديننا بيحض علي العلم
    اطلبوا العلم ولو في الصين
    تحياتي ياهبة
    دمتي لي اختا فاضلة

    ردحذف
  9. ههههههه بصراحة عندك حق كله بقي يفكربالطريقه دي وهي اللي كسبانه الأيام دي
    بس مش تعقدني ياسواح اناداخله علي دراسات عليا حرام عليك

    وع فكرة وبجد كل الأجيال اللي هتيجي بعدين هيقولواعلينا أنناكنامتخلفين عشان كنا بنتعلم وبصراحة أنامش شايفه ان البلددي فيهاتعليم ولا مستقبل لحدغيرللناس اللي انت اتكلمت عنهم وجعلت من البساطة شعرننصت له
    تحياتي لك

    ردحذف
  10. اخذ العالم من المسلمين اساسيات العلم والآن أصبحنا نستورد منهم العلم والتكنولوجيا جاهزين .ربي يرزقنا التغيير يا سواح علشان الحال اصبح متعب

    تحياتي

    ردحذف
  11. افــــروديت
    اولا ربنا يوفقك في دراساتك وتبقي دكتورة
    قد الدنيا
    ويارب تعبك ييجي بفايدة باذن الله
    بس هو ده الحال المهبب اللي
    احنا عليه دلوقتي
    لعيب الكورة والفنان
    في شهور يبقي معاهم لو اشتغل
    واحد معاه دكتوراه طول عمره
    مش هيجيب نصهم
    تحياتي

    ردحذف
  12. كلمــــــات من نور
    عندك حق اختي الفاضلة
    الحال بقي صعب
    من قديم الازل والعالم بيتقدم بالعلم
    وعارف قيمته
    واحنا العلم عندنا اهملناه
    انظري لقصة ياجوج وماجوج وكيف
    استطاع ذو القرنين بعلمه
    ان يحجبهما عن الناس ويمنع اذاهم
    اليس بالعلم
    تحياتي

    ردحذف
  13. ههههههههههه

    ميرسي ع التشجيع

    هروح بكرة أحذف اسمي ياسواح

    ردحذف
  14. افروديــــــت
    ليه بس يادكتورة
    لا طبعا
    العلم حلو برضه
    لولا العلم ماكنا عرفنا حاجاتكتير عن
    الدنيا
    الجهل يشبه العمي ايا كان منصب صاحبة ونفوذه
    ربنا يوفقك يادكتورة
    انا اول واحد
    يشجعك
    تحيتي ليكي

    ردحذف
  15. أخي سواح للأسف هي دي الحقيقه الظاهره لكن المثقفين و الفاهمين يعرفوا يفرقوا كويس بين اللي بيضيع عمره في تفاهه و اللي عايز يبقى له قيمه حقيقيه بين الناس
    للأسف موازين كتي اتقلبت أشكرك على البوست الرائع
    تحياتي الخالصه لك

    ردحذف
  16. شــــــيرين سامي
    اختي الفاضلة
    طبعا كلنا نعرف قدر العلم
    ((وقال الذي عنده علم من الكتاب
    انا اتيك به قبل ان يرتد اليك طرفك))
    صدق الله العظيم
    هكذا هو العلم يادكتورة شيرين
    يقهر المستحيل
    تحياتي ليكي يااختي الفاضلة

    ردحذف
  17. مساء الخير
    هههههههههههههههههههه
    هههههههههههههههه
    بصراحة دمعت ضحك
    ايه من حمير ومعيز
    وحضار
    كلمات حلوة تنفع لها اغنيه
    ندخل بالجد
    عن نفسي مااشجع اني اخلي ابني انه يسيب الدراسة والمذاكره
    ويروح يلعب
    ولا يلب شباب ويسهر معاهم
    يمكن عشان الوضع عندكم
    لكن عندنا الحمدله في شوية حياة
    عندنا من معه شهاده يشتغل ويحصل مرتب احلى
    صح انه مش حكومي
    خاص لكن الخاص احلى من الحكومي مليون مره
    لو ماكنت واثقة ان بعد ماتخرج اني مابحصل شغل ماكنت كملت دراستي
    لكن لو مانجح مشروعي ممكن الاقي شغل بسرعة
    طبعا شغل خاص
    الحمدلله الدنيا عندنا لسه فيها ذرة خير
    ربنا كريم
    هو الي ياخذ للانسان حقه
    تقبل مروري
    سلامي ليك اخي خالد.

    ردحذف
  18. كلمات معبرة جدا يا سواح على واقع للأسف حقيقى


    تحية ليك

    ردحذف
  19. هههههههههههههههه
    ياخسارة السنين اللى ضيعتها بقى الواحد طلع عينه وفى الاخر ماحصلش اللعيبه والممثلين وتصنيفه بين موظفين الدوله يعنى حاجة تكسف

    ليه بس تقليب المواجع ده يا خالد

    ردحذف
  20. حلووووة اووي

    و قرائتها احلى

    ما شاء الله تقدر تخليها متلحنة كدا لوحدها :)

    و القضية معاك كل الحق بيها

    اصلنا بزمن ... بنبص فيه بالمقلوب !

    ردحذف
  21. بسم الله وبعد
    كلمات جميلة
    بوركت على ما خط به قلمك

    تفبل مروري

    ردحذف
  22. ماشألله عليك اخ خالد

    والله معاك حق فى كل كلمه

    بس الايام دى

    مابقاش حد بيدور على الصواب

    كله همهم الدروس الخصوصيه

    حقا ابدعت اخى

    يسلم احساسك ونبض قلمك

    تحياتى

    ردحذف
  23. رشــــــــا
    اختي الطيبة
    كلنا زيك كدة بنحب العلم
    والعلماء
    بس ياخسارة
    في الوقت بتاعنا ده
    العلم مبياكلش عيش
    لعيب الكورة
    والمغني
    هما دلوقتي اللي طالعين بيهم
    فوق والعلم والعلماء
    ولا حتي بيذكروهم
    تحياتي يارشا الطيبة

    ردحذف
  24. Ms Venus
    ميس فيــــــنوس
    اهلا بيكي
    فعلا واقع حقيقي
    تحياتي اختي الطيبة

    ردحذف
  25. reemaas
    نور البنوته
    اهلا بيكي
    ده اصله ذنبهم ان علموكي
    شفتي اديكي اهو لاطايلة سما ولا ارض
    مش كنتي عملتي البوم كان احسن ليكي
    تحياتي يانور
    بس تعرفي مهما كان العلم ليه قيمته
    تحياتي يابنوتة

    ردحذف
  26. قطرة وفـــــا
    للاسف هو ده حال عالمنا العربي
    تحياتي ليكي لمرورك
    وتعليقك الطيب
    منوراني والله

    ردحذف
  27. ابو مجاهد الرنتــــــيسي
    اهلا بيكي
    مرورك يااخي تشجيع لي
    انت اخ كريم كسبناه
    تحياتي

    ردحذف
  28. اختــــــي الفاضلة
    جــــــــايدا العزيزي
    دروس خصوصية
    ورداءة تعليم
    وفي الاخر يطالع
    مايلاقيش شغل
    كانهمبيحاربوا العلم والتعليم
    تحياتي اختي الطيبة

    ردحذف
  29. انت وضعت يدك
    علي كل سلبيات المجتمع
    والتي اصبحت قيمه
    والهيافه سعرها
    عالي
    واللي ميقدرش يبقي
    هايف
    عمره ماسعره حايبقي
    عالي
    وعجببي

    ردحذف
  30. كارولين فاروق
    هههههه
    تعليقك رغم انه بسيط
    لكن معبر اوي
    وحزين جدا
    فعلا هو ده المجتمع اللي
    احنا عايشينه دلوقتي
    تحياتي

    ردحذف
  31. السلام عليكم
    صحيح ما هم بيقولوا اللى اتعلموا خدوا ايه وعملوا ايه
    ما هم مالين الارصفة والشوارع والقهاوى
    وحتى لو ربنا كرمهم واشتغلوا هيخدوا كام
    لكن اللى يلعب او يغنى او يمثل بيتحسب وقتهم باجزاء الثوانى
    مش كدا ولا ايه

    ردحذف
  32. رحــــــلة حياة
    نحن العرب فقط الذي لم نقدر العلم حق
    قدره
    ولكن في كل الدول المتقدمة
    العلم عندهم كما قال طه حسين
    كالماء والهواء

    ردحذف
  33. للأسف صح الصح

    اي حاجه في اي حاجه

    كورة غنا هابط

    زي ابو الليف

    الراجل صوته حلو واسمه كمان حلو(نادر)

    فضل يغني عادي ماتشهرش

    اول ماغني هبل وسمي نفسه اسم غريب
    بقا اشهر من النار علي العلم

    كل سنه وانت طيب

    ردحذف
  34. مـــــدام
    شمـــــــس النهار
    ابو اليف
    كان زمان لماحد بيدخل الوسط الفني
    بيختارولة اسم فني
    ليه زوق يعني
    زي عبد الحليم حافظ
    صباح
    دلوقتي حتي انحدرنا في اختيار الاسماء
    تحياتي
    سيدتي الفاضلة
    وكل عام وانتي بالف خير

    ردحذف
  35. دا انا اللى جالى اكتئاب

    تحفه اوى على فكره

    ردحذف
  36. اعقــــل مجنونة
    اهلا بيكي
    سلامتك من الاكتئاب
    اشكرك
    نورتيني

    ردحذف
  37. يعنى شاعر , بحق , ولديك سيول جارفة من الكلمات والتعبيرات , تستحق عليها أكثر مما يمكن أن يكتب.

    ولكن دعنى أخبرك أن أمثال هؤلاء التافهين لا يقتدى بمثلهم أصحاب العقول النضلاة المفكرة المتأملة , فيكفيك يا صاحب العلم أنك تستجيب لمولاك الذى أمرك ب "اقرأ" ويكفيك يا صاحب العلم أن يكون الله معك , ويكفيك يا صاحب العلم أنك تسمو عن أمثال هؤلاء

    دمت شاعر يا سواح :)

    ردحذف
  38. Samakafelmo7eet
    اااه يامروة
    و كانهم يدعوننا ان لاتتعلموا
    لان العلم تضييع وقت
    العلم يفقر ولايثمن من جوع
    ويتحكم في مصائرنا الجهلاء
    فاما الزبد فيذهب جفاءا
    واما ماينفع الناس فيمكث في الارض
    صدق الله العظيم
    تحياتي يامروة

    ردحذف
  39. اه والله جابولنا اكتئاب
    وكملت عليا الوزيرة المصونة عائشة عبد الهادى بالخبر ده
    http://www.youm7.com/News.asp?NewsID=325348&

    والله منا عارفة احلم لابنى بايه ؟
    دكتور ومهندس والكلام ده ماعدش له قيمة
    باباه حدد موقفه خلاص ونفسه يلعب فى الاهلى :)

    مين عارف يمكن الحال يتصلح عما يكبر ويقدر يحدد اللى يناسبه

    ربنا كبير

    ردحذف
  40. حاجـــــت جوايا
    الرياضة مش وحشة
    بس مش لازم تبقي كل حياتنا
    لازم يبقي لينا قيمة بالعلم
    واللعب ده يبقي شئ جانبي
    تحياتي ليكي اختي الفاضلة

    ردحذف
  41. كلامك صح والله يا سواح

    شئ محزن للاسف

    كلامك فكرني بمره بسأل بابا بقوله هو انا لو سافرت في المطار هدخل من باب كبار الزوار

    ضحك وقاللي لا طبعا اللي يدخلوا من الباب ده اللاعبين والممثليين والرقاصات


    هو ده حال بلدنا

    روح اي مكان وشوف اي واحد معاه شهاده بيتعامل ازاي

    وعلى العكس شوف الممثليين ولاعبين الكره والرقاصات بيتعاملوا ازاي

    ربنا يرحمنا ويدينا على قد مجهودنا

    مشكور يا سواح على كلماتك الجميله

    ردحذف
  42. دكتوره
    ولاء صلاح
    هو ده الحال المخزي اللي اصبحنا عليه
    دلوقتي
    لكن مهما فعلوا لن يستطيعوا اهدار قيمة العلم
    تحياتي يادكتورة

    ردحذف

اهلا بزوار المدونة

تعليقك الكريم يضيف الي مدونتي

سواح في ملك الله