Follow by Email

22 يونيو 2011

عجا يب

 الاخوان المسلمين والتيار الديني

الكلكيعة الي ُمًورمة نافوخ المثقفين الليبراليين والعلمانيين

سابوا السياسة والاوضاع في البلد واتفرغوا تفرغ تام للاخوان

المسلمين  بيعملوا ايه وبيقولوا ايه وكل كلمة بتخرج بيدخلوها

معامل التحاليل وبيشوفوا ايه مغزاها ومعناها ومش بعيد يدوروا لها

علي مثيل في القاموس العربي التركي الهندي  عشان يعرفوا

اصول الكلمة ومعناها وتاريخها ايه وجات ازاي

ياااااااقوم

ده لو فريقين كورة  فريق بيلعب احسن من التاني  الفريق اللي بيلعب

وحش  بيقعد يتدرب تدريب مضاعف عشان يوصل لاقرب

مستوي للفريق اللي عنده مهارات  ويحاول يفوز عليه

البهوات بقي سايبين التدريبات والتمرينات  وعمالين يراقبوا

في الفريق التاني وخلاص

طيب ده ينفع  وييجوا يقولوا مش هنلحق نخش الانتخابات

عشان فيه فريق مستعد واحنا مش مستعدين

ماتستعدوا

انتوا ايه الي حايشكم

كنت اعتقد ان المثقفين او مايدعون الثقافة متبحرين في السياسة

ولكن ؟؟؟؟؟؟

 

هناك 57 تعليقًا :

  1. أوضاع البلد كلها مباقتش مريحه و بقت عجيبه و الفتره اللي فاتت للأسف علمتنا منثقش في بعض ده غير ان الناس اتعقدت من التكتلات و القوى السياسيه يمكن عشان كده عاملين حساب للاخوان خايفين يبقوا زي الحزب الوطني, خصوصاً ان مواقفهم أحياناً بتبقى مش واضحه و انتشروا بطريقه غريبه لدرجة اني بقيت بشوف يافطه ليهم في كل شارع.
    أنا عن نفسي مع اللي فيه مصلحة البلد و أتمنى اللي جي يكون خير و يكون قلبه على الناس و يعمل على النهوض بالبلد.
    تحياتي ليك

    ردحذف
  2. لو محتاجين مدرب يا ريت ياخدوا حسام حسن وببلاش بس علشان حرقة الدم :)
    امبارح رديت على سؤال للاستاذ محمد الجرايحي على قصة من قتل الديمقراطية سألني هل فعلا القصة خلصت وبقت ذكريات
    كانت اجابتي ان افكارنا لسه زي ما هي وكل اللي حصل ان الديمقراطية كانت كلبا واحد يتبع صاحبه فاصبحت مجموعة كلاب تتبع العديد من اصحابها كل واحد فهمه عن الديمقراطية هو ما يراه فقط مش بيفكر ان في اغلبية وفي تصويت وفي ناس ليها اراء
    الليبراليين عايزين يطبقوا ديكتاتورية الاقلية على اساس انهم بيفهموا اكتر
    طيب مادام بتفهموا اكتر فهمونا معاكم ولا انتو بس اللي بتفهموا واللي ممكن تفهموا؟
    اشكرك على البوست الرائع
    تحياتي

    ردحذف
  3. شيرين سامي

    التكتلات يادكتورة مهمة في الحياة السياسية

    هل كل هذه القوي والائتلافات مش عارفة تجذب

    الناس طيب ليه نلوم علي الاكثر جاذبية وشعبية

    طالما هما فشلوا في ذلك

    تعرفي ان فصيل الاخوان مهم جدا بالنسبة

    لمرشح الرئاسة

    اللعبة السياسية يادكتورة ماتعرفش الخوف

    يعني اللي بينجح هو اللي بياخد الاغلبية

    ايا كان

    تحيتي يادكتورة

    ردحذف
  4. مصطفى سيف

    ههههه والله عندك حق يادكتور

    بس علي فكرة حسام حسن كان ضد الثورة

    من ثائري جامعة الدول العربيه

    وفعلا طالما فاهمين هما اكتر يفهمونا

    يمكن نفهم

    اللي يضايقك انهم لسة مفكرين ان الشعب

    المصري محتاج وصي

    تحيتي يادكتور

    ردحذف
  5. والله ياخالد مانا عارفه اقولك ايه وخصوصا انى حاسة انى بتفرج على مسرحية والممثليين بايخين كمان

    ومسلسل فصل مرشح الاخوان للرياسة من الحزب ده مسلسل باااااااااااااااايخ جدا مخلينى حاسة ان احنا بنلف فى دواير

    فزاعه الدولة الدينيه والسلفيين والاخوان دى بجد بقت اسطوانة مشروخة

    معروف من زمان ان الاخوان سابوا الافكار الدعوية او خلوها تانى اهتمامم ليهم وبقوا سياسيين درجة اولى ولسه بيتلاموا على انهم بيتحركوا
    ما ده طبيعى انهم يتحركوا دى فرصتهم

    المشكلة بقى فى اللى بيتفرج عليهم وواقف عمال يدعك فى عنيه مش مصدق نفسه

    ردحذف
  6. reemaas

    ده زي مايكونوا بيحققوا كلام مبارك للغرب

    اما انا او البديل التيار الديني

    ابلغ تعبير عن الموقف عجبني تعبيرك

    المشكلة في اللي بيتفرج وعمال بيددعك في

    عينه

    مش مصدق نفسه

    تعبير بليغ جدا في كلمتين من

    اذكي بنوتة

    تحيتي يابنوتة

    ردحذف
  7. أخى الفاضل: سواح فى مللك الله
    الحمد لله أن سقطت أقنعة الزيف التى كانت تدارى قبح وحوههم وعلم الجميع من هم وماذا يريدون.....
    تقبل أخى تقديرى لطرحك القيم
    بارك الله فيك وأعزك

    ردحذف
  8. مش عارفة اقولك ايه بس كل التيارات قاعدة لبعض
    حاجه عجيبة
    وكله بيلطش في كله
    وياويله ياسواد ليله اللي يغلط في كلمة

    زي ماانا هكتب بوست دلوقتي عن قيادي اسلامي تاااااااااني بيغلط في المراة
    :)))))

    كله الا المراة

    ردحذف
  9. الاخوان كلكيعه لانهم واقعيا بيتاجروا بالاسلام و ده خطره يكمن فى وجود اربعين مليون امى بيخدعوا بكلامهم .. بيقدموا نفسهم على انهم ممثلين للاسلام بينما هم محترفى كذب و صفقات و بتوع مصلحة و كراسى مش مبادىء و اخلاق و ارى ان هم اساءه للاسلام و افساد للسياسة...و اطلاقهم بهذا الشكل و هم تنظيم دولى و له تمويل دولى عبث و مخالف للقانون فلا يجوز ان يكون لحزب فروع فى دول اخرى و او تمويل غير معروف و ياتى من الخارج

    ادخلوا السياسة فى الدين فادخلوا المدنس فى المقدس فشوهوا الصورة تماما كما فعل شيخ الازهر و بابا الكنيسة عندما كانوا يساندوا الباطل باسم الدين

    الاخوان يوم الاستفتاء على الدستور و تدليسهم على البسطاء

    http://www.youtube.com/watch?v=hM8ZaG9gFac&feature=youtu.be


    فيديو توثيقي من تاريخ الاخوان

    http://www.youtube.com/watch?v=Tnyx4CADkWg


    ان اكرمكم عند الله اتقاكم (سورة الحجرات)...ولكن الاخوان لا يؤمنون بذلك

    http://www.youtube.com/watch?v=2gZv3qJG0WU

    فيديو...في نقابة الاطباء ..امين الصندوق عصام العريان ...جماعة الاخوان تستخدم اموال واوراق وسيارات نقابة الاطباء المخصصة لخدمة المواطنين والمرضى لدعاياهم الانتخابية ..هل سرقة اموال النقابة ومعداتها هو من الاسلام في شئ؟؟؟
    وهل هذا هو المنهج الذي يروج له الاخوان المسلمين ؟

    http://www.youtube.com/watch?v=Pd3lAVVrmhE

    ابراهيم العراقى احد مرشحى جماعة الاخوان المسلمين فى الدقهلية فى انتخابات 2010 يوجه بيده حركة بذيئة للجمهور اثناء مناقشة التعديلات الدستورية .. الفيديو قد لا يكون مناسبا للجميع

    http://www.youtube.com/watch?v=NswVvnITKtE

    فيديو لمواجهة ممثل الاخوان بالصور و الاتصال باسرائيل

    http://www.youtube.com/watch?v=wYU2LykwyBo


    لماذا لم يرفع الاخوان قضية ضد تلك المجلة إن كانت وثائقها ملفقة؟ و هل يجوز لحزب سياسي مصرى او جمعية ان تلتقى بالصهاينة فى الظلام او يكون لها تمويل دولى و فروع خارج الحدود و تؤتمن على مصر؟

    وثائق الاتصالات السرية بين الجماعة و أمريكا وإسرائيل

    http://www.rosaonline.net/Daily/News.asp?id=112304

    طلاب الإخوان يمنعون جولة لأنصار البرادعي داخل مدينة الأزهر الجامعية بأسيوط

    http://www.elfagr.org/DailyPortal_NewsDetails.aspx?nwsId=10790&secid=1

    و الناس مش فاهمه السبب فياريت تدخل على جوجل و تكتب
    يدعوت احرنوت:صعود البرادعي يضر بامن اسرائيل


    دى أخلاق اللى عايزين يحكموا مصر و عاملين بتوع ربنا؟

    اسلامنا ارقى كثيرا من عبث جماعات الاسلام السياسي التى تضلل و تكذب و تتلون بل و تنصب باسم الدين من اجل مصالحها الدنيوية

    الاسلام مافيهوش كهنوت و لا مكتب ارشاد

    الاسلام لا يبيح ما استحلوا لانفسهم من كذب و تدليس باسم الدين و قد نرتضى بهم كجماعه سياسية رغم خطرهم على مدنية الدولة و نهضتها و ما خلفته فروعها فى كل الدول الذى وصلت فيها للحكم (حماس..السودان..الصومال) من دمار و لكن هم ليسوا ابدا ممثلين عن الاسلام بل متاجرين به

    ردحذف
  10. محمد الجرايحى

    الاستاذ الفاضل عندك حق فقد كان قناعهم

    النظام البائد وحين ازيل

    تخبطوا وبحثوا عن من يعارضوه للمعارضة فقط

    تحيتي

    ردحذف
  11. شمس النهار

    هو فيه مثل قديم بيقول

    (بدلا من ان تلعن الظلام اوقد شمعة )

    وانا لااقصد اساءة لاحد بكلمة الظلام

    ولكن علي من ينتقد فليتحرك

    عشان يكون علي الاقل في وزن من ينتقده

    ده الي مضايقني

    ردحذف
  12. السلام عليكم

    والله اخى الفاضل انا اعصابى تعبت جدا جدا من كل الاخبار اللى بنسمعها
    تقريبا نسيوا اهداف الثورة والكل بيتكلم اخوان اخوان سلفيين ليبراليين ....
    هو فيه ايه ماكل الاحزاب دى كانت موجودة من زمان ...

    المشكلة اننا محتاجين ثورة فى عقولنا تفهمنا أسلوب الديموقراطية ازاى نتعامل معاه

    الوضع اصبح لايطاق زى مايكون وليمة وناس جعانين ..

    انا مقتنعة تماما ان الشعب عرف فين حقه ولو اى حزب تولى الحكم وما اعطى الشعب حقوقه كلنا عرفنا ازاى نوصل لها لاننا عرفنا الطريق

    واعتقد ان الشعب مش هيرضى غير بفكر اسلامى بالنهاية لانه لايصح الا الصحيح

    تحياتى لك
    دمت بكل خير

    ردحذف
  13. Tears

    ياتري هتصدقيني لو قولتلك اني اعيش في وسط

    هؤلاء الاميين اللي بتتكلمي عنهم

    الغريب ياتيرز ان هما مش سذج وفاهمين كويس

    السياسة وفاهمين مين اللي صح ومين اللي غلط

    بصي ياتيرز

    لما تحصل ازمة انابيب بوتجاز بسبب التجار

    الجشعين كانوا بيمنعوا عربية الشركة

    انها تخش المنطقة عشان همابيبيعوا الانبوبة

    بمبلغ خمس اضعاف

    وييجوا الاخوان يحلوا المشكلة ويجيبوا العربية

    تحت حمايتهم ويمنعوا البلطجية من اعتراضها

    ويبيعوها بسعرها الرسمي

    مش ده يكسبهم شعبيه عند الناس

    الناس عايزة ايه غير الي يحققلهم مصالحهم

    ده موقف من مواقف كتير ياتيرز

    وافتكر ان ده مالهوش دعوة بالدين ولا

    التاثير الديني

    ردحذف
  14. أم هريرة.. lolocat

    اختي الفاضلة

    المشكلة انهم بيتكلموا عن الديمقراطية ولا

    يعملوا بها

    المطلوب ان كل القوي تطرح نفسها

    واللي ينتخبة الشعب نرتضيه

    لكن انا شايف ديكتاتورية الليبراليين

    في الاثتئثار براي منفرد ومحاولة

    التاثير علي الناس فشلت في الاستفتاء

    فقد كانوا ضيوفا علي الاعلام قبل الاستفتاء

    ولما تشوفي الهجمة الاعلامية

    تحسي ان9و99 في المية هيقولوا لا

    وها قد اثبتوا انهم غير قادرين علي اقناع

    الشعب

    تحيتي اختي الفاضلة

    ردحذف
  15. المصيبة انهم فعلا متبحرين فى السياسه ورغم ذلك مش محصلين منهم غير القرف !!

    تحياتى المستعطرة

    ردحذف
  16. أنا والله داغى وجعتنى من الصدااااااع ده ... اختلافات على الفاضى والمليان

    ياريت يبقى الإختلاف مجدى لكن إحن حاسين اننا بنلف حوالين نفسنا

    ومش بنعمل أى حاجه

    الناس البسيطه عايزه حياه مستقره ومش فاهمين أساسا ايه اللى بيحصل فى البلد

    الناس دى محتاجه توعيه .. لكن ولا حد بيفكر فيهم أساساً

    متفقه معاك

    دمت بكل خير (: (:

    ردحذف
  17. الأوضاع كلها في مصر ملخبطه على الآخر والله ..

    وكل واحد فيهم فاكر نفسه إنه هو اللي بيفهم وبس !!

    يفهم إيه ما أعرفش وهيه دي السياسة

    تحياتي الصادقة لك

    ردحذف
  18. والله معاك حق قلت اللي في نفسي بجد
    يااااااااااه على وجع الدماغ اخوان ومش اخوان
    طيب ما كل واحد يشوف نفسه وزي ما بتقول يستعد
    رغي رغي رغي ... ده شعار سياسة مصر حاليا

    يا خلق ما تمرجحوش مصر بقا عاوزين نرسيها على بر

    ردحذف
  19. عباس ابن فرناس

    عندك حق ياعبس والمنظرة والفلسفة بتاعتهم

    دي مالهاش لازمة خالص

    ردحذف
  20. عندما تبعثر رسائلك

    اهلا بيكي

    يشرفني مرورك وزيارتك لمدونتي

    زطبعا لازم ازور مدونتك

    ردحذف
  21. دعاء العطار

    عندك حق

    الناس فعلا محتاجة توعية

    بس كل واحد بيفكر في نفسه

    تحياتي

    ردحذف
  22. كريمة سندي

    والله كلامك مظبوط

    للاسف يااختي الفاضلة

    ان اكتر ناس فاهمة وواعية هي الناس البسيطة

    اكتر من المثقفين نفسهم

    تحيتي

    ردحذف
  23. mira@

    لللاسف ياصديقي وكان الثورة خلصت

    وبيحكوا مذكراتهم

    تحيتي

    ردحذف
  24. أخى سواح
    والله لا فض فوك
    صدقت أخى ياريتهم يشتغلوا شوية بدل الندب زى الولايا .. على رأيك كل شوية يقولوا الإخوان منظمين .. مش ح نلحق نجمع أصوات قبل الإنتخابات ... طيب ما هو ده من خيبتكم التقيلة .. هو ذنب الإخوان إنهم منظمين رغم كل القهر اللى شافوه طول السنين اللى فاتت وأنتم قاعدين مأنتخين وبعدين عايزين تكسبوا جاتكم خيبة
    تحياتى

    ردحذف
  25. أنا حرة

    كثيرا يااختي الفاضلة ماتعجبت من هؤلاء

    خاصة في موضوع الاستفتاء

    اللي مش عاجبهم وعايزين يغيروه

    ولم اجد دعاية فجة لكلمة لا الاستفتائية

    مثلما فعلوا

    ولكن اتضح لهم ان الشعب يعي هذا

    وان الشعب لايميل لعنجهية المثقفين

    الديكتاتوريه المقنعة بغلاف ثقافي غربي

    تحيتي اختي الفاضلة

    ردحذف
  26. السلام عليكم
    الموضوع بسيط يا سواح
    يستعيروا جوزية شوية ههههههههههه
    مشكلتنا اننا دايما بنمسك فى نص القربة المخروم ونقول هو السبب فى ضياع المياه
    ما هو لكل واحد اشتغل واستعد هيبقى فى تغيير وتنمية حقيقية واعتقد ان فى ناس تتعب جدا من الموضوع دا وايه المشكلة لما نعلق اسباب فشلنا على شماعنة اصل وفصل
    شكرا لك صديقى
    تقبل مرورى

    ردحذف
  27. والله عجايب الزمن دا كترت أوي وبقت لا تسر عدو ولا حبيب تحياتي لقلمك المميز

    ردحذف
  28. مدونة رحلة حياه

    ههههه جوزيه ممكن برضه

    سمكن ياخدوا كاس افريقيا

    مش المطلوب يااخي العزيز ان نعمل شماعة للفشل

    نعرف بس احنا فشلنا في ايه

    ونعالجه

    تحياتي ونورتني

    ردحذف
  29. أم

    عندكم حق والله

    نورتيني بتعليقك

    تحيتي

    ردحذف
  30. انت صح فى ان المفروض الكل يشتغل

    لكن انا معلش عندى سؤال خارج الموضوع شوية

    هو ليه اى نقد بيكون للاخوان او لاى حزب دينى بيترجم على انه نقد للدين ؟!


    طيب مش ده ادعى اننا نطالب ان الدين يكون حاجة والسياسة حاجة ؟


    يعنى الناس اللى عمالة تتكلم وتقول مش عارفين ليه خايفين من الدولة الدينية

    مش عارفين ليه رافضين الدولة الدينية

    ما الاجابة من تصرفاتهم نفسها


    الدين المفروض اعلى وارقى من اى عمل سياسى


    اللى عاوز يدخل الدين فى السياسة وبعدين يرجع يزعل من النقد ده يتقال عليه ايه ؟

    ردحذف
  31. انا مش فاهمة هما خايفيين من الاخوان لية علشان حزب منظم
    اعتقد ان من يعترض على الاخوان ويخاف منهم لن يستطيع ان ينجز وسيظل مكانة
    تحياتى
    اسفة على التاخير فالنت فى اسوء حالتة

    ردحذف
  32. Ms Venus

    الجميلة فينوس

    مين اللي قال كدة

    بصي يافينوس لا الاخوان المسلمين ولا السلفين

    هما الدين *الدين اكبر واشمل من مجموعات

    او اشخاص او حكام حتي

    بصي يافينوس

    انا وجهه نظري في البوست ده

    ((ان الله لايضيع اجر من احسن عملا ))

    لم يشترط الله في هذه الاية ديانة للمتقن في

    عمله

    يعني ربنا مابيضيعش اجر من يحسن عمله

    حتي لو كان بلا ديانة اصلا

    وانا بشوف الاخوان مجتهدين في الاعمال

    اللي بتخدم الناس يعني اقراي ردي علي تيرز

    وقولي رايك

    ردحذف
  33. هبة فاروق

    الاخت والاديبة الرائعة

    قبل ردي علي حضرتك اوصيكي بتبليغ سلامي

    لاستاذنا فاروق فهمي

    ولاختنا الفاضلة كارولين

    بالنسبة للرد الغريب ياهبة

    ان النخبة شافوا الاخوان دخلوا المعترك

    السياسي

    قاموا اتصدموا وجالهم هلع

    وركنوا علي جنب وقعدوا يتفرجوا

    الاخوان بيعملوا ايه ويحللوا تصرفاتهم

    وبس

    ودي الكارثة امال لو مسكوا البلد هيعملوا

    ايه

    لما هما اعصابهم خفيفة اوي في السياسة كده

    تحياتي للاديبة الرائعة

    ردحذف
  34. يا سواح انا فهماك وموافقاك طبعا

    واول جملة فى تعليقى قولت لازم الكل يشتغل

    مينفعش انام وافضل اعيط واقول غيرى بينجح وانا لا ليه


    انا بس الملحوظة اللى قولتها دى خارج موضوعك خالص

    لكن دى ظاهرة واضحة جدا

    لما تيجى تهاجم او تنتقد اى حزب دينى بيعمل بالسياسة بتلاقى الهجوم وبتلاقى اتهامات انك بتهاجم الدين

    دى الكارثة ودى المشكلة

    الدين اعلى وارقى

    الدين يتطبق بتصرفات الناس الصح

    الدين يتحافظ عليه باخلاق الناس نفسها وبايمانها بيه

    لكن عمر السياسة ما كانت ولا هتكون جزء من الدين لان مينفعش اصلا

    ردحذف
  35. Ms Venus

    الاخت الجميلة فينوس

    طبعا عندك حق متنسيش يافينوس ان اثناء

    حكم الرايس المخلوع

    كان اللي ينتقد الرايس يخرجوا علينا

    بعض المنافقين ويقولوا ان ده اساءة لسمعة

    مصر واكيد فيه كتير توارثوا هذه العادة

    السيئه

    يعني لما حد ينتقد شيخ يقوللك اساءللدين

    رغم ان شيخ الازهر السابق وهو رمز ديني

    شبع مننا انتقادات

    وم يغضب احد

    لكن اللي فاهم يعرف ان الدين لايختصر

    في اشخاص او مجموعات

    تحياتي لوعيك اختي الفاضلة فينوس

    ردحذف
  36. ‏(منيبين اليه واتقوه واقيموا الصلاة ولا تكونوا من المشركين * من الذين فرقوا دينهم وكانوا شيعا كل حزب بما لديهم فرحون)
    تسلم ايدك تقبل مروري

    ردحذف
  37. Carmen

    حقا كارمن كل حزب بما لديه فرحون

    تحيتي

    ردحذف
  38. الله ينور عليك يا خالد تسلم ايدك على موضوع رائع بحياديه دون تحيز لاي طرف وانا معاك تماما ليه ناس مهمتها وشاغله نفسها بافكار الاخرين ما تفرجنا على افكارها وتقنعنا انها احلى واحسن وهتوصلنا لبر الامان ليه انت بتدور على صور وفيديوهات تظهر بشاعة الغير ما تجيب صور وفيديوهات تثبت انك الاحسن والاجدر بالمنصب انا مش هيفرق معايا مين يفوز في اي انتخابات بدام فيها عدل وانصاف ومش فيها تزوير ياريت الكل يحاول يثبت نفسه بدل ما بيشغلوا نفسهم باثبات الخطا على الاخرين
    تحياتي لك

    ردحذف
  39. ng_semsem

    مهو ده الي احنا عايزينه يابشمهندس

    ان كل الناس تشتغل والاجدر يقود

    انما انا حاسس ان القوي السياسية مهزوزة

    وكانهم غير مقتنعين بما يقولون

    ولكنه الكبر

    تحياتي لك

    ردحذف
  40. من راقب الناس مات هماً

    كنتُ هنا .. أخوكم أبو يمنى

    ردحذف
  41. أبو يمنى

    عندك حق من رافب الناس مات كمدا

    تحيتي

    ردحذف

  42. السلام عليكم:
    الاخ سواح..احييك على الموضوع القوي..وعلى قناعتك الراسخه فيما طرحت..
    اعجبني ردك العملي الصادق على تيرز باظهارك شهادة عمليه عايشتها انت والجميع مثلك . مقابل فيديوهات الله اعلم بمن يجمعها ويسوقها ولصالح من تنشر..!!
    الشعب المصري (الامي....)(ذكي) وبيعرف مين يخدمه ممن يضحك عليه...
    كان تعليقي اطول من هذا فاختصرته على ان اضعه في موضوعي الاخير في ارض الايمان
    إن شاء الله تعالى..

    تحياتي لك وللشعب (الامي....) المحترم

    ابن الايمان

    ردحذف
  43. ابن الإيمان

    بالعكس اخي ايا كان حجم تعليقك فهو اضافة لمدونتي

    المشكلة اخي ان الناس فاكرة الشعب المصري

    محتاج حد يفكر له

    صدقني اخي شعبنا العظيم هذا الشعب البسيط

    يمتلك نسبة وعي وثقافة لدرجة تجعله يعي من

    هو الاصلح ليمثله

    ولكن هناك اناس لايريدون ان يستوعبوا ذلك

    تحيتي ونورتني

    ردحذف


  44. السلام عليكم

    أعتذر لأني جاية متأخر

    فيه مثل شعبي دمه خفيف ينطبق على حال النخبة اللخمة دي

    بيقولك : اللي متعرفش ترقص تقول الأرض عوجة
    :)

    هم خيبتهم موردتش على حد و ماسكين في الإخوان لأنهم عارفين وضعهم كويس وبيحاولوا يلاقوا مبرر من الآن عشان لما النتيجة تظهر ولم ينجح أحد يقولوا الإخوان زوروا أو اتفقوا مع الفلول أو مع المجلس أو مع الثورة المضادة أو جالهم تمويل من السعودية اللي هي في نفس الوقت بيقولوا عنها بتحمي المخلوع !!!!
    رغم إنهم هم اللي قبضوا من أمريكا !!!

    صح

    الأرض عوجة
    :)

    ردحذف
  45. مجداوية

    هههههه عندك حق اختي الكريمة

    وليه متكونش رجليهم هي اللي عوجة

    هههه

    تحيتي

    ردحذف
  46. مابقاش فى حاجة كويسة فى الفترة دى
    السياسة لازم يكون فيها دين
    لاننا ماشيين بشرع ربنا قبل اى شىء
    بس المهم ان الشخص اللى بيحكم مايستغلش الدين فى قترة حكمه استغلال سىء

    ردحذف
  47. Noha Saleh

    كلام معقول يااستاذة نها

    ده متوقف علي ان الناس دلوقت بقت تقدر

    تميز مابين

    المستغل للدين والمتدين

    تحيتي لكي

    ردحذف
  48. في انتظارك واجب تدويني بعنوان صندوق الذكريات اتمنى تقبله
    تحياتي

    ردحذف
  49. السلام عليكم .....فى الحقيقة يا أخى سواح لقد سئمت من السياسة و السياسيين و اعتقد أنه بلاء أدعو الله أن يخلصنا منه كنت أعتقد أنه سيظهر شخصا يترشح للرئاسة و يعلن من أول لحظة سأحكمكم بكتاب الله هذه الكلمة كافية بالنسبة لى و تفوق اى برنامج انتخابى لكن للأسف كل مصرى أصبح سياسى يتكلم فى السياسة أكثر من أى شىء و نسينا أن الدواء فى بيوتنا نقرأه فى رمضان و يوم الجمعة فقط لم نشغل أنفسنا بالاستعانة بالله و بكتابه فى بناء بلادنا .....وفقك الله

    ردحذف
  50. eng_semsem

    يشرفني يابشمهندس اني احل الواجب

    تحيتي

    ردحذف
  51. esraa

    الحقيقة يااسراء التصارع ده والتعطيل ده

    يس في مصلحة الوطن والجدل الكثير

    والاتهامات المتبادلة ماهي الا استهلاك للقوي

    الوطنية

    تحيتي اختي الفاضلة

    ردحذف
  52. يا سواح

    اليوم الكل عامل نفسه سياسي بس الحقيقة ان ولا واحد فاهم شئ بجد !
    حتى نحن يمكن يجي يوم ونكتشف شئ عن الوضع هذا صح كلامي او لا ؟ البعض يقولي
    ليش تقولي كذا نتي ضد ثورات ؟

    انا مش ضد ثورات بالعكس و انا لا نكر حقيقة فساد كل حاكم عربي معظمهم هذا ان لم يكونوا كلهم ! بس انا ببساطة براقب الوضع بلا تحيز لحد لذا بشوف حاجات غريبة بشوف تناقضات و امور تخليني اشك واسئل نفسي هل بيجي يوم ونكتشف شئ مكناش نعرفوا او تخدعنا فيه في المستقبل ؟؟ ممكن ليش لا !

    معنديش معلومات كثيرة فيما ناقشته انت بس اقدر اقول اني مش بشوف الاخوان وحشين للحد هذا بس يمكن في ناس مش من مصلحتها تخلي الاخوان تقرب من الحكم .....
    وسلام ياعم

    ردحذف
  53. الغاردينيا

    اولا حمدالله علي السلامة

    الحقيقة ياغاردينيا

    انا قصدي في البوست ده ان كل القوي السياسية

    تشتغل

    والشعب يختار الي يشوفه احسن

    تحيتي

    ردحذف
  54. السلام عليكم...
    إن لم تستطع أن تبني بنيا أعلى
    من غيرك فأهدم بنيان غيرك

    هذه هي قاعدتهم بإختصار

    على ادعائهم أنهم لا يتعاملون إلا بالعقل و العقلانية والمصلحة إلا إنهم لا يعزفون إلا على أوتار المشاعر في تكريه الناس فيمن لا يريدون هذه استراتيجيتهم والتخطيء والاستهزاء بالخصم هي سمتهم

    طرحك قوي ببساطته ومحاوره
    موفق ^_^

    ردحذف
  55. خاتون

    حقا هذه هي قاعدتهم اختي الفاضلة

    والجميل ياخاتون انهم يتكلمون من فوق برج

    عاجي وعامة الشعب لاتصدقهم يخيل الي

    انهم لو حكموا لن يفرقوا كثيرا عن

    الديكتاتور

    السابق

    تحيتي اختي اراكي ذوا معرفة واسعة

    زادكي الله علما

    ردحذف

اهلا بزوار المدونة

تعليقك الكريم يضيف الي مدونتي

سواح في ملك الله