16 أغسطس 2011

وامــــــا الســــــــا ئل فلاتنـــــــــــــهر

المشهد

علي المقهي انا وصاحبي ودار بيننا حوار

 انت بتديها ليه اللي انت شايفها دي اغني منك 

رديت عليه بس دي مدت ايديها  تبقي محتاجة وبعدين 
 وانت اشعرفك انها اغني أو افقر
   
بس دي  شابة صغيرة وشكلها حلو

 وممكن  تشتغل اي شغلانة عشان ماتمدش ايديها
متنساش ان فيه طفل رضيع علي ايديها يمكن ملهوش غيرها

وهو اللي مانعها عن الشغل 

ماحدش يعرف ظروف الناس ايه 

صاحبي

انت بطريقتك دي يمكن بتجرأها وبتشجعها انه  تشحت طول عمرها 

ويمكن اكون سبب في انها ماتمشيش غلط

وانت بنفسك قلت انها شابة  صغيرة وشكلها حلو

يعني هي لو عايزة فلوس حرام هي في غني  عن انها تمشي عشرات الكيلومترات

 لما رجليها تورم  كل يوم

  وتتحايل علي اللي زيي واللي زيك

وواحد يديها وواحد يبصلها

بازدراء ويقول لها الله يسهللك ياست

 وبعدين انت الجنيه الفكة ده اوالربع او النص جنيه ده مش هيفرق معاك حاجة

وجايز يفرق معاها كتير الله اعلم بعباده 

انت طيب قوي وشكلك متعرفش الاشكال دي 

 رديت عليه         ( واما السائل فلا تنهر )   صدق الله العظيم            
 

 

هناك 35 تعليقًا :

  1. صباحك غاردينيا سواح
    كم أستمتعت بحوارك مع زميلك وكل ماقلته جعلني أبتسم من القلب حقاً مبلغ بسيط تقدمه لكلك المتسوله قد يغنيها..وقد يساعدها في تلبية حاجة او سد جوع ..لازلت أصدق ماتقوله امي حين تتصدق لايهم ان كانت المتسوله كاذبة او صادقة ولكني اهبها على النية ..
    جزاك الله خير وجعلها في موازين حسناتك "
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
  2. صدق الله العظيم
    كتير والله بفكر فى نفس الموضوع ده
    هو الواحد يديهم وهو هيتحاسب على نيته مالوش دعوه اللى بيشحت ده بيشحت عشان محتاج والا لا ؟
    والا مش نديهم عشان مش نشجعهم على كده؟

    بس انا فعلا بيستفزنى لما يكون اللى بيشحت ده انسان سليم ومش بتعوقه اى عاهه عن الشغل
    مهما كان الشغل قليل او حتى فلوسه اقل
    بس اكيد اكرم من الشحاته

    موضوع مهم
    تسلم ايدك

    ردحذف
  3. ماهو ماتنهروش ماحدش قال انهروا

    بس انا مع صاحبك يا خالد دى بقت وظيفه والاطفال اللى على اديهم دول ايا كانوا هم مين فمنتهى الدنأة استخدامهم كده فى الشحاته

    المحتاج بيكون عفيف يتحرج يسأل الناس وحاله يدل عليه

    ردحذف
  4. ريــــمــــاس

    صباح الفل يااطيب ريماس

    خيرا فعلت السيدة الفاضلة والدتك

    تحيتي لكما

    ردحذف
  5. Bent Men ElZaman Da !!

    هو انا بقول ان اي انسان طالما وضع نفسه في موضع انه

    يمد ايده يبقي محتاج

    وقد ترينه انتي من وجهه نظرك غير محتاج

    لله اعلم بظروف الناس


    تحيتي اختي الفاضلة

    ردحذف
  6. reemaas

    مهو يابنوتة مش كل الناس بتتمتع بقوة الاحتمال والصبر علي الحاجة

    ويمكن يكون انسان محتاج فعلا والمبلغ الصغير بتاعك هيفرق معاه

    ويمكن امتناعك انتي وغيرك عن


    اعطاؤه يؤذيه

    تحيتي يابنوتة

    ردحذف
  7. علينا ان نتحرى الصدقات لمن يستحق قدر الامكان ولكن في حالة الذين يسالون الناس فانا وانت قد لا نعلم ظروفها قد تكون فعلا في حاجة ماسه لتلك النقود

    ردحذف
  8. eng_semsem

    يابشمهندس اصل الحكاية بسيطة

    لما امراة تتسول شوية قروش

    فمش مستاهلة التحري

    تحيتي

    ردحذف
  9. حقا واما السائل فلا تنهر
    ولكننا دوما ننسى
    النيات هي اهم مبدا في الصدقات وما تكنه الصدور هو ما نحاسب عليه
    فعلينا ان نجعل هدفنا من الصدقة ابتغاء وجه الله لا غيره
    تحياتي

    ردحذف
  10. الحقيقة انت صح وهو صح

    بس انا بحب امشي بالحديث له ماطلب ولك ماطلبت

    ومره اختلفنا في الموضوع ده وكان في ندوة للدكتور المسير رحمه الله تعالي
    فاسألناه
    قال ماتدوش لأن دي اصبحت مهنه تسئ للأسلام
    ولو امتنع الجميع مش هيمتهنوها
    وقال اصلح الله ولي الامر

    بس في قصة بقا حصلت لي انا شخصيا
    لي صديقة ظابط شرطة في احد الاقسام بيسموها اخصائية اللي هي بتعمل بحث للناس دي
    كنا في اشارة وواحد غلبان وبيترعش ومش قادر يمشي وبيتعكز علي ابنه الصغير وتحس انه هيموت حاااااالا
    وفعلا الناس كانت بتديلة ولما وصل عندنا وبص في العربية ولاقاهاااااااا
    اتنفض وطلع جري هو وابنه
    :)))))))
    انا اتخضيت وبعد كده فضلت اضحك علشان هي قالت لي لسه كان مقبوض عليه والمحامس مطلعة امبارح
    :))))
    رمضان كريم

    ردحذف
  11. انا كتبت تعليق مش عارفة اتنشر ولا لأ
    :))

    ردحذف
  12. مصطفى سيف

    عندك حق يامصطفي النية لازم تكون لله وهذا مانبتغيه من

    رب العباد

    تحيتي ايها المبدع

    ردحذف
  13. السلام عليكم...

    جزاك الله من كل أنواع الخير وكثر الله من أمثالك
    يحفظ الله بالاحسان الأمم .. ويمكن أعنتها على عفة
    نفسها فعلا
    المرأة سقت كلبا فأدخلها الله الجنة فكيف بإنسانة وان شاء الله تكون مسلمة ومعها طفل صغير
    في ناس تحبط الأخلاق والشيم

    عسى الله أن يثبتك على ما أنت عليه

    موفق ^_^

    ردحذف
  14. شمس النهار

    سيدتي الفاضلة

    رغم اني احترم جدا العالم الكبير محمد المسير رحمه الله

    لكني اختلف في هذا الرأي انسانيا علي الاقل

    هي امشكة في بلدنا هي انه لابد توفير حد ادني من

    الدخل لمواطن يحقق له حياة كريمة وبعدها

    لو شفنا متسول في الشارع بقي لازم يتحبس

    بمناسبة موضوع صاحبة حضرتك

    مرة شفت متسول في الشارع بيمارس دور انسان مشلول

    قعيد عشان الناس تعطف عليه وتديله وكان بالصدفة في

    عيال بتحدف بعض بالطوب

    فلما الطوب قرب يوصلله ويمكن جه عليه

    قام من مكانه وجري خوفا من ان طوبة تيجي فيه

    سيدتي يوجد النموذجان ولكن دورنا

    ان نميز بين ماهو محتاج وماهو مدعي

    ولاناخذ هذا بجريرة ذاك

    تحيتي سيدتي

    ردحذف
  15. الناس دى فى منها المحتاج فعلا ومنهم اللى فعلا اغنى مننا
    فكرتنى بحاجة حصلت قدامى من فترة
    كان فى واحدة متسولة قاعدة قدام محل كنت بشترى منه حاجة وعلى ايديها طفل رجله متجبسة صعبت عليا جدا وفهمت انها بتعمل كده لان مثلا مالهاش عائل ودى الطريقة الوحيدة

    فضلت متابعاها من بعيد وكنت لسة رايحة ناحيتها لقيت الطفل اللى معاها(عمره حوالى سنة)بدأ يبكى وهى بدأت تنهره فبدأ يحرك رجليه(المكسورة)فبدأت تضربه وتقرصه علشان ينام وهو يبكى اكتر انا نظراتى لها زادت واتنرفزت والناس اللى فى المكان شايفينها وهى بدأت تلاحظ ان الناس شايفاها
    صاحب المحل قالى انها بتضربه لانه مش مخليها عارفة تشتغل وهى بتيجى هنا كل يوم وده بيحصل منها دايما مع الولد
    طبعا هى اترعبت واخدت الولد ومشيت
    ورجعت عادى تانى يوم بعد كده
    الولد ده ممكن يكون مش ابنها
    ودى كده مش غلبانة دى نصابة
    بس للاسف احنا مش دايما بنعرف نحدد مين الغلبان
    وفعلا ربنا أمرنا بعدم نهر السائل ابدا
    اسفة على التطويل

    ردحذف
  16. خاتون

    فعلا اختي خاتون يجب ان نفكر في الجانب الطيب من القصة

    انها ربما بعض الاموال القليلة تردها عن فعل سئ ونكون

    نحن قد ساهمنا في هذا

    ونبتغي من هذا وجه الله الكريم

    شكرا اختي نورتيني

    ردحذف
  17. Noha Saleh

    فعلا يااستاذة نها

    فيه فعلا نصابين كتير بس النصابين دول بيظلموا المحتاج

    بس المهم احنا نفرق بينهم

    مثلا مرة كنت جالس برضه علي مقهي منفردا

    منتظر اصدقاء

    وجه راجل وقف قدامي

    الراجل ده لابس جلباب شكل الجلباب وقماشته اللي هو

    الكستور المخطط بتاع زمان ده الي مبقاش حد يستخدمة

    دلوقتي والراجل شكلة مايديش علي متسول

    اكثر ماميز هذا الرجل في عيني انه مش محتاج

    ان الجلابية مرقعة رقع كتير

    وان الرقع ديه معمولة بحرفية علي ماكينه خياطة

    مش يدوي يعني

    المهم رفضت اعطاؤه اي شئ

    ومشي

    بالصدفة ببص في الترابيزة اللي جنبي

    لقيت ناس عمالة تتفرج علي المنظر

    فضحكت وسالتهم قالولي عارف الراجل ده

    لو كنت اديتله حاجة كنا هنزعل قوي

    سالتهم ليه قالولي الراجل ده مش محتاج وقعدوا يعددولي

    في املاكه وانهم يعرفوه ويعرفوا ولاده

    ولاده ليهم مراكز كبيرة وبيستعروا منه

    تحيتي يااستاذة

    ردحذف
  18. هذا موقف يتكرر كثيراً و تحدث تلك الحيرة دائما هل هو فعلا محتاج ام لا؟
    و لكن اذا اعطينا فنحن نحاسب على نيتنا و جزينا بالثواب و الحمد لله ، فلعله خير ينفعنا فى مواقفنا الصعبه بعد ذلك ، و كلمة صغيرة على الهامش "فى ظل ما نحن فيه من الظروف فسوف نجد الكثيرين الذي جار عليهم الزمان ، فلا داعى نكون نحن أيضا عليهم"
    جزاك الله على كل خير تفعلوه و يجعله فى ميزان حسانتكم إن شاء الله .

    ردحذف
  19. انت صح ان النية فعل الخير


    مع ان حقيقى اللى بيكون محتاج مش بيطلب

    ردحذف
  20. ريهام المرشدي

    نتمني من الله عز وجل ان يكون خيرا ينفعنا في دنيانا

    نورتيني بتعليقك الطيب

    تحيتي

    ردحذف
  21. Ms Venus

    الاخت الجميلة فينوس

    تعرفي انا بحس ان هذا السائل او هذه السائلة

    هي من اعطتني دعوة قد تستجاب من الله عز وجل

    ولست انا من اعطيتها

    تحيتي لكي يافينوس

    ردحذف
  22. جميل جدا

    انا اول ما نزلت مصر

    كنت اي حد يمدلي ايده بديه

    بس لقيت كدا اني ممكن اروح بيتنا مفلسة

    لكن انا حاطة قواعد للموضوع دا

    لو طفل مش هديله .. لأني بشجعه على كدا

    هو ممكن يشتغل اي شغلانة او حتى يبيع مناديل

    لو رجل ومش عنده أي علة

    لا بردو مش هديلة لأنه ممكن يشتغل اي حاجة

    لو رجل عنده علّة يبقا هساعده عمياني

    لو رجل عجوز اوي هديله بردو

    لو واحدة ست عجوزة هديها

    لو ست ومعاها عيال هديها بردو

    يعني كدا ممكن اكون مش صح تماما

    لكن ع الاقل بحاول اعمل الصح

    :)

    ردحذف
  23. المحير فى الموضوع ان الكثير من دعاء الفضائيات يحرمون على الناس اعطا مثل هولا ويسمونهم متسولين ومن الجائز ان يكون بعضهم كذلك لكن بتاكيد ان منهم الكثير فى اشد الحاجة الى الصدقة وكما قلت انت الربع ولا النص مش هيفرق كتير وخصوصا ان الحاجة والسوال اكيد بيكون صعب على اى انسان
    وعلى حد علمى ان هناك حديث للرسول عليه الصلاء والسلام
    يقول فيه : اعطو السائل ولو كان على ظهر حصان :)
    مابالك لو كان راكب كرسى بعجل !
    والله اعلى واعلم

    ردحذف
  24. εïз Semsema εïз

    انا شايف ان تصرفك سليم جدا

    ونسبة المساعدة فيه اكتر من الي بيدي

    اي حد في اي وقت او مبيديش اي حد لخوفه انه يكون

    بينصب فبيمنع عن الكل

    تحيتي لتصرفك الطيب

    ردحذف
  25. عباس ابن فرناس

    عندك حق ياعباس

    فعلا فيه ناس كتير في امس الحاجة للقرش

    ونبقي بنظلمهم لو اتعاملنا علي ان الكل نصابين

    بس هو عيبنا ان احنا بنتعامل بمبدا

    السيئة بتعم

    تحيتي ليك ياعبس

    ردحذف
  26. السلام عليكم اخى
    مشكلتنا دلوقتى يا ابو على اختلاط الحابل بالنابل حتى ضاع من يسأل لحاجته وسط من اعتادوا التسول
    معك حق ومعه حق ولكل وجهة نظره وزاوية رؤية مختلفة
    دومت بخير

    ردحذف
  27. معلش يا سواح انا هاختلف معاك

    اولا هى لو اخذت من القهوة الواحدة خمسة جنية فى ميت قهوة فى اليوم اصبح دخلها 500 جنية اكبر من اى دخل تتصوره

    يجب ان نعقل اولا و بعدين ده طفل رضيع فين ابوه
    هى مملكة اسمها مملكة الشحاتين

    تحياتى

    ردحذف
  28. مدونة رحلة حياه

    والله يااخي صابر معك الف حق

    بس لازم منظلمش الي محتاج عشان

    فيه ناس بتنصب

    هنا بقي لازم الواحد يميز بين االلي محتاج

    واللي بيدعي

    تحيتي اخي الفاضل

    ردحذف
  29. ابراهيم رزق

    اخي الفاضل هو اولا مبتتحسبش كدة

    لان في 100 قهوه دول ممكن ناس كتير تفكر بنفس المنهج

    المرتاب ان هؤلاءمدعين فعلا


    انا بحسبها حسبة بسيطة اوي طالما الانسان قبل يمد

    ايده ويتعرض لاهانة هذا وذاك

    وده يديلة وده يبصلة بازدراء

    حتي لو مش محتاج يبقي برضه محتاج وللي بياخدة ده

    تمن بخس جدا مقابل اهدار كرامته بالتسول

    اما لو محتاج فيارب يفك زنقته ويعطيه

    ردحذف
  30. أحييك لإثارتك لهذا الموضوع ، موضوع التسول

    ردحذف
  31. محمد الجرايحى

    اخي الفاضل

    كنت اتمني ان اري رايك في الموضوع نفسه

    تحيتي لك

    ردحذف
  32. شكرا لسؤالك أخي سواح فقد كنت في مكة ولا يوجد انترنت ..

    موضوعك جدير بالطرح فمبلغ بسيط قد يسد رمك أسرة بكاملها وهذا واجبنا تجاه إخواننا في الدين بارك الله فيك على هذا الطرح الهادف

    ردحذف
  33. كريمة سندي

    اختنا الفاضلة

    اولا لاشكر علي واجب فانتي اختا فاضلة نجلها كثيرا

    ونفتقد مواضيعها المميزة

    حمد الله علي السلامة

    عندك حق فهو واجبنا تجاه اخواننا

    وليس فضل او منة مننا فالفضل كله لله تعالي

    نورتيني بتعليقك الطيب

    تحيتي

    ردحذف
  34. بصراحة انتي رديتي اروع جواب ممكن يردوا اي شخص في نفس الموقف ( و اما السائل فلا تنهر )

    مش عارف انت شو ظروف هذا الانسان ليمد لك يده و يستجديك فتات قوته

    لو مكنتش ظروفوا وحشة بحياتواما كان مدايدوا و شحد

    هو في ابشع و اصعب من الحاجة و انك تكسر نفسك و عزتها و تطب من حد حاجة ممكن انو يرفض يديهالك او ينهرك او حد يزقك و يشتمك !!

    ردحذف
  35. haneen nidal

    اهلا بحضرتك

    فعلا هو الانسان لو مش محتاج فلماذا يمد يده ويعرض نفسه

    لاهانة هذا او ذاك

    اشكر لكي تعليقك ووجودك الكريم بمدونتي

    تحيتي لكي

    ردحذف

اهلا بزوار المدونة

تعليقك الكريم يضيف الي مدونتي

سواح في ملك الله