18 مارس 2012

قـــــرار مصيري



يوم الخميس
 روحت اشتريتلي بدلتين
وكام قميص
انا اصل عقبال عندكم 
قررت اترشح
رئيـــــــس

وهاألف واجمع توقيعات
من الواحات
واسكندرية
 والســــــويس

ومؤهلاتي
بصــــوا. اهيه
لاعمري يوم كنت صاحب
الضربة الجوية
ولاحتي عندي
عربية
ولاعندي سيدة اولي
تكبر وتستأسد
علـــــــيه
ولا عيلين يبرطعوا
في ام البلد
طايحين وفاكرينها
وســــــية
 انا مش هكون
ولاراعي فن
وفنانين 

ولا هرعي نصب ونصابين
ولا بحب الكدابين
ولا هبقي حكيم للزمان
كل اما اقوللي كلمتين
يطلع ضلالي
يقول امين
ولا هبقي يوم لابد في كرسي
الحكم زي
 الفراعين
انتخبوني هتلاقوني
هفتحلكوا علي طول تليفوني
خط مباشر
للجمهور
انتخبوني وهنغنغكم
وههيصكم
هالغي كمان فواتير
 النـــــور
انتخبوني
وهصرف لكوا شقة وعربية
وهعيشكوا في هنا
وســــرور
انتخبوني
وكل مواطن
ليه انبوبة وبجنيه عيش
وهخليه ميقفش
طابـــور 













هناك 58 تعليقًا :

  1. خلاص هات ليا عربية وان اضمن ليك اصوات المدينة اللى عايش فيها هههه

    كلمات رائعة تعبر عن واقع نعيش فية الان
    تسلم ايدك

    مع خالص تحياتى

    ردحذف
    الردود
    1. Tamer Nabil Moussa

      هههههه طيب مش لما انجح في الانتخابات ابقي اجيبلك عربية

      شكرا ليك ياتامر نورتني

      تحيتي لك

      حذف
  2. هههههههه معاك يا ريس

    الله يوفقك
    كانوا عاملين اعلان كويس انك لحقت

    بيقول

    الحق ورشح نفسك كل الناس رشحت نفسها لو ملحقتش هتبقى لوحدك الشعب هههههههههه


    على بركة الله وحلوة البدلة الحمرا :)

    دمت بخير

    ردحذف
  3. أمة الرحمن

    ههههههه

    ايه ده يعني كل الناس هتترشح وانا المواطن الوحيد

    كويس اني لحقت بقي

    هههههه تحيتي ليكي

    نورتيني

    ردحذف
  4. بلاش دا انا عملها قبل منك بس ماشى يا عم ارشحك

    ردحذف
    الردود
    1. الموجى

      معلش ياعمرو

      معرفش ان انت كمان مترشح

      تدفع كام واتنازللك عن الكرسي

      ههههههههههه

      تحيتي

      حذف
  5. محدش فاضل لسه في البلد مرشحش نفسه
    و الله حاجة تموت من الضحك

    ردحذف
    الردود
    1. مصطفى سيف الدين

      لا يادزش لسة فيه انا وانت مترشحناش

      هههههه

      تحيتي ياصديقي

      حذف
  6. صباح الغاردينيا ياخالد
    امممم
    يعني انا لما انزل مصر المرة الجاية حيكون الريس خالد هههههههههه عشان اشاور عليك واقول دا صاحبي في التدوين
    شفت انا بحلم ازاي :)
    نيجي بقى للجد ربنا يحفظ مصر ويكتب لها الخير يارب بس برضو لو كنت ريس حتكون الدنيا بخير بس اوعى الوحشه على قولت أستاذ مصطفى تغريك وتخرب لنا عقلك النظيف :) "
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
    الردود
    1. ريـــمـــاس

      اميرة العاردينيا

      متخافيش يااميرة دانا ممكن كمان اعينك وزيرة

      عندنا وابقي اقول رئيس يطبق

      ان الوزير ممكن يكون من هوية عربية

      هههههههه

      تحيتي يااميرتنا الرائعة

      حذف
  7. انا معاك يا ريس
    مش علشان الشقه ولا العربيه ولا حتى العيش
    علشان الصدق والضمير والخوف من الله
    تستحق الرئاسه بجداره يا خالد بجد مش هزار
    بس البدله البيضاء اقيم واشيك علشان انا زملكويه متعصبه ههههه
    بوست لذيذ ودمه خفيف اشكرك عليه

    ردحذف
    الردود
    1. هبة فاروق

      الاديبة الرائعة

      اديني ضمنت كام توكيل اهوة

      ربنا يخليكوا ليا ياعائلتي في بلوجر وميحرمنيش منكم

      معلش بقي البدلةالحمرا دي عشان بعد مالشعب يثور

      عليا ههههههههه

      تحيتي

      حذف
  8. وعلي ايه البدلتين :)

    كله زي الفل بس
    ايه موضوع سرور ده
    :))

    ردحذف
    الردود
    1. شمس النهار

      معلش بقي ياست الكل

      في حكاية سرور دي

      اصل القافية حكمت ههههههه

      تحيتي ياشموستنا

      حذف
  9. احنا وراك يا معلم
    امتي بس واحنا نروحوا الشهر العقاري
    الموضوع في عربيه ونغنغه والكلام ده كله
    وانا حاقول للواد شألشه وجيه
    علي طول بس يا رب يبقي فاضي مش زي كل مره
    استنوني اوعوا تروحوا بدري علشان بصحي متإأخر
    هههههههههه
    والله يا خالد انا ضحكت من قلبي كتير في البوست ده
    تحياتي العطره يا ريس

    ردحذف
  10. ;كارولين فاروق

    كنت عارف من الاول ان اهلي في البلوجر

    كلهم هيرشحوني

    سيبك من شألشة ههههههه هو مش هيقدر يتكلم

    علشان لو قصر معايا اول مابقي رئيس هاعتقله

    ههههههه

    تحيتي الطيبة لمبدعتنا

    ردحذف
  11. طب ان نصيبي حايكون ايه يا خالد
    مش اقل من عربيه بحصان
    انا من اوائل المؤيدين لك يا خالد
    بس انت ابدأ وفتح نظر
    تحياتي

    ردحذف
  12. faroukfahmy58

    استاذنا وعمنا فاروق فهمي

    لو حضرتك اترشحت انا هتنازللك عن الانتخابات

    وهكون اول المؤيدين

    ولو انا ترشحت ونجحت

    انا حجزت لجضرتك منصب رئيس الوزراء

    ونائب الرئيس

    هههههههه تحيتي ليك ياعمنا واستاذنا

    ردحذف
  13. السلام عليكم خالد

    الف مبرووووك مقدما ههههههههه

    المهم انك ماتلبس البدلة الحمرا البيضا اجمل كتير ههههه

    طبعا مش هعلق على مهرجان الترشيحات والرئاسة
    لكن هعلق على كلماتك الجميلة البسيطة السلسة الرائعة
    احييك اخى ودايما يارب متألق ومبدع

    ومتأكده انك مش هتكسب فى الانتخابات لأن الصادقين ليس لهم مكان فيها ههههههه

    تحياتى الدائمة لك وباقات ياسمين تعطر يومك

    ردحذف
  14. ليلى الصباحى..

    هههههه كدة يااختنا ليلي

    افهم من كده انك مش هتوقعيلي علي الرئاسة

    ده انا كنت ناوي اعينك وزيرة

    يلا بقي زي بعضه

    ربنا يخليكي ويكرمك واكون دائما عند ظنك

    تحيتي يااختنا الغالية

    ردحذف
  15. السلام عليكم يا سيادة الرئيس..
    أكيد طبعا أنك بذلك ستنجو من دفع غرامة عدم الترشح لرئاسة الجمهورية، ما هي خلاص بقت انتخابات مليونية!
    وعلى فكرة أنا جاهز بعمل التوكيل بشرط الأنبوبة والشقة والعربية وكام جنيه مصروف نقدية وقرارك ده طبعا مية مية حتى نقدر نقول لينا مدون مرشح في الانتخابات المليونية.
    تقبل خالص تحياتي..

    ردحذف
  16. Bahaa Talat

    وعليكم السلام اخونا بهاء

    لا دانت اول واحد هبعتله العربية و الانبوبة لحد عنده

    والشقة بقي بعد الانتخابات

    عشان ناوي اعمل مشروع عشرة مليون شقة مجانية

    مفيهاش دفع مقدم ولا ايجار

    هههههه تحيتي اخي المواطن

    ردحذف
  17. ههههههههههههههه
    ممكن امسكك محضر رشاوى بس علشان خاطرك هعديها
    بس علي شرط الشقه يكون فيها بلكونه وواسعه كده
    اقل من 400 الف مش هرضي ههههههههههههههه

    ردحذف
  18. rona ali

    ههههههههههههههههه ليه كده يارنا

    دانا كنت حاطط أمل كبير عليكي انك هتمسكيلي الحملة الانتخابية

    عموما ولا يهمك

    شقة وبلكونة وربعميت الف كمان

    ههههههه بس بلاش حكاية المحاضر دي

    تحيتي يارنا

    ردحذف
  19. ههههههههههههههههههه هنتخبك جدا جدا طبعا اعملها انت بس

    ردحذف
  20. reemaas

    الحمد لله كدة ضمنا المنصورة معانا

    هههههههه

    ردحذف
  21. أخى المبدع الرائع : خالد
    لغة سهلة وجميلة ، وبرنامج انتخابى شفاف هههههههههههه
    بس بصراحة خايف عليك من الكرسى ......

    ردحذف
    الردود
    1. محمد الجرايحى

      اخي واستاذي محمد الجرايحي

      متخافش اخي

      انا اول رئيس هيلغي المادة اللاصقة اللي بيستعملوها في الكراسي

      ههههههههه

      تحيتي اخي الرائع

      حذف
  22. هشتقنا وبشتقنا يا ريس دا انت رئيس جدع وطويس
    ههههههههههههههههههه
    ازسك يا سواح عامل ايه واحشنى كتير برشا برشا مكنتش اعرف انك مشغول عننا بجملتك الانتخابيه طب كنت قول يا راجل عشان الم الناس ونصوت قصدى نصوت لك يعنى ههههههه
    دومت بخير

    ردحذف
    الردود
    1. مدونة رحلة حياه

      هههههههه اهو احنا فيها

      انا ناقصلي 50 توقيع بس

      يالا حظك بقي تلمهملي هههههههه

      تحيتي

      حذف
  23. يامساء الخير على الي بيرشح نفسه

    خلاص الان باجي مصر اخذت طيارة تاكس واجي
    دي فيها عربية وشقه طيب في وظائف معاهم ههههههههههههههههه
    خلاص اضمن صوتي هههههههههه

    كلام رووووووووووعة وعود ياخوفي تطلع كذابه هههههه

    ازيك ياخالد؟؟؟؟؟؟
    يارب تكون بخير وبصحة وعافية ياريس البلاد ^__^

    تقبل مروري.

    ردحذف
    الردود
    1. خواطري مع الحياة

      مساء الفل علي اجمل اخت

      طبعا مش اخت الريس لازم تاخدي تاكس وتيجي حالا

      وكمان هعينك وزيرة الشئون العربية

      نورتي يارشا انا الحمد لله بخير

      المهم متغيبيش علينا

      تحيتي

      حذف
  24. ههههههه أنا موافقة ومن أول المؤيدين وأعملك دعايا فى باقى المحافظات كمان
    حلو البوست أوى
    :)

    ردحذف
    الردود
    1. nesma hatem

      جميل يانسمة

      اهو انا كدة شكلي هبقي ريس رسمي

      طالما هتمسكي الدعاية الانتخابية

      متخافيش اول مابقي ريس

      هحجزلك منصب وزيرة برضه

      تحيتي يانسمة

      حذف
  25. كلام جميل بس مش فيه غير عيب واحد بس
    هعيشكوا في هنا وسرور
    تاني سرور تاني سرور
    تسلم ايديك يا صاحبي ومش تقلق احنا وراك واخترناك اخترناك
    تحياتي

    ردحذف
  26. eng_semsem

    ههههههههه اوعدك يابشمهندس اول مامسك الرياسة

    هالغي كلمة سرور وعز ومش هخلي حد يهني حد بكلمة مبارك

    هههههههه تحيتي

    ردحذف
  27. ايه دة قشطه
    لاء خلاص محاضر ايه بقي
    يعنى القانون يطبق علي مرشاحين الرئاسه الغلبانين
    واللى في السجن لاء واللى وكل الريس المخلوع لاء برضوا
    ملهاش لازمه القوانين
    ايه جماعه انتوا بتفكروا ولا إيه يلا رشحوا اخونا خالد بقي

    انا مسكت الدعايا يا سيدي خلاس متشلش هم
    ^_^

    ردحذف
    الردود
    1. rona ali

      خلاص اتفقنا

      واوعدك بمنصب نقيب المحامين

      هههههه يالا بقي

      تحياتي يارنا

      حذف
  28. لو كده
    يبقى انا مرشحاك من دلوووقتى :))

    ردحذف
    الردود
    1. Bent Men ElZman Da

      اهو هما دول الاخوات ولا بلاش

      يالا اهو فاضلنا تسعة وعشرين الف توقيع هههههه

      تحيتي يادينا

      حذف
  29. السلام عليكم
    لو هاتعمل كدا بجد هاتنجح و تبقى رئيس
    و مش هاتضيع فلوس البدلة و القميص
    تحياتى

    ردحذف
    الردود
    1. ريهام المرشدي

      ههههه لا منا بعد الحملة الانتخابية

      هرجع البدلتين

      مهو اللبس هيبقي علي حساب الدولة بقي

      ههههههه

      تحيتي

      حذف
  30. انا موافقة
    حنتخبك ان شاء الله
    :)

    ردحذف
  31. نهر الحب

    اشكرك ايها المواطنة الصالحة

    سعدت بتواجدك في مدونتي

    تحيتي

    ردحذف
  32. هههههههه....خلاص انا هنتخبك بس توعدني بالشقه ..مش مهم العربيه اوي...اهم حاجه الشقه اتجوز فيها...بس اوعي بقي بعد ما تاخد المنصب تنساني ..هزعل منك

    ردحذف
    الردود
    1. amiraali

      لا متخافيش

      اخلي شقة لاميرة

      هخليهم يفصلولك ضشقة مخصوص خمس اوض وصالتين

      بس انا انجح بس في الانتخابات

      تحيتي

      حذف
    2. هههههههههههههههه.....لا انا مش طماعه كفايه عليا 3 اوض...

      حذف
    3. amiraali

      انتي تؤمري يااميرة احنا لينا مين غير الشعب

      تحيتي

      حذف
  33. كل سنة وانت طيب
    وربنا يديمك ابن غالي

    ردحذف
    الردود
    1. شمس النهار

      كل سنة وانتي طيبة يااطيب شمس في الدنيا

      اشكرك علي المشاعر الجميلة دي اوي

      تحيتي

      حذف
  34. ههههههههههه

    مش مصري بس أكيد من حقك يا سواح تنتخب زي ما كل مواطن

    له حق وبجد أتمنى من قلبي أن المرشح الفائز بكرسي

    الرئاسة ينفذ وعوده ويرتقي بمصر لأعلى المراتب ...

    تحياتي وإحترامي

    ردحذف
  35. ريبال بيهس

    اخي الرائع فارس

    مين اللي قال انك مش مصري ههههه

    انا نسيت اقوللك اني اول ماستلم كرسي الرئاسة

    هخلي من حق الاخوة العرب ينتخبو ا

    علشان طمعان في مدة تانية هههههه

    اشكرك فارس علي رقة مشاعرك تجاه بلدنا الحبيب

    وهذا ليس بغريبا عليك

    تحيتي

    ردحذف
  36. بوست جميل ماشاء الله اخي خالد ،بس عارف كان ممكن انتخبك رئيس لو حطيت في برنامجك اني تجيب لكل واحدة كمان عريس دا انت كنت حتكسب كتييير ههههههه
    الي الامام دائما ان شاء الله

    ردحذف
  37. I have changed

    بس كدة غالي والطلب رخيص

    هههههههههه

    ماهم مرميين عالنواصي بدل ميضايقوا خلق الله

    نقبض عليهم ونجوزهم اجباري

    هههههههههه

    تحيتي لكي

    ردحذف
  38. بجد بجد تحفة
    حلوة جدا
    وطالما البرنامج كده انا موافقة
    واهه يبقى الرئيس من المدونين ويبقى عارف مشاكلهم

    ردحذف
  39. Noha Saleh

    شكرا يااستاذه نهي

    مبسوط جدا ان برنامجي الرئاسي اعجبك

    هههههههههه

    اما بالنسبة للمدونين

    فهما طبعا هيكونوا ليهم الاولوية علشان ميهاجمونيش

    ويكتبوا عني بوستات كويسة

    اسعدني وجودك

    تحيتي الخالصة لكي

    ردحذف
  40. سواح رئيسا للجمهورية

    مدون مننا

    سنحى كراما مع سواح

    معاك و الله يا سواح انا نفسى فى رئيس من الغلابة اللى زينا حاسس بالناس و بمشاكلها بس ليه البدلة
    نحن نطالب برئيس بقميص و بنطلون

    بس خلاص تحياتى

    ردحذف
  41. ابراهيم رزق

    اخويا العزيز مهي البدلة دي لزوم حفلة

    استلام مقعد الرئاسة هههههه

    وبعد كدة بقي يبقي قميص وبنطلون ويمكن ترينج كمان


    تحيتي ياصديقي الرئع

    ردحذف

اهلا بزوار المدونة

تعليقك الكريم يضيف الي مدونتي

سواح في ملك الله