تاملات

 كل ماتبص حواليك تلاقي فرعون في كل مكان ودايما اسال نفسي هي دي طبيعه شعب ولا طبيعه  شعوب الدنيا كلها ؟   -----                   لو ليك مصلحه مثلا في جهه ما حكوميه تستلرم استخراج شويه اوراق بيتحول الموظف المسئول  بقدره قادر لفرعون ينظم الصفوف ويشخط وينطر في الناس كانهم شغالين عند اللي خلفوا جنابه  ويمنع ده ويمنح ده حسب مزاج  سعادته  مع العلم ان الافندي بيقبض مرتبه  من فلوس تاديه المصلحه بتاعتك والغريبه ان معظم الناس بتنصاع ليه  وتنفذ اوامره  تبقي غلطه مين ؟ غلطته هو والا غلطه اللي انصاع ليه و عمله فرعون؟                                           فرعون اخرسواق الميكروباص بقي  لما يكون مفيش حد عالمحطه او عالموقف السوق نايم  يعني!  يفضل يتحايل علي الناس عشان تركب عنده وكانه عايزيشيلك من  عالارض ويحطك في العربيه تعالي بقي ساعه الذروه الزحمه يعني  يقف بعظمة بقي ولو حد ساله رايح الحته الفلانيه يبص قدامه ال يعني الواد مفكر عبقري  وفرصته بقي  وبعدين الناس تقف قدام الباب مستنيين  الوحي ينزل علي السواق  ويقول ايوه رايح  واول ماينطق ينفتح الباب بقدره قادر وناس تزق في بعض  وممكن يضربوا بعض عشان كل واحد يلحقله كرسي  ولما بقي الناس تركب  يبص وراه  ال بيعد الناس ويلاقي نفرين تلاته زياده واقفين مركبوش  يشاور بقي  خد واحد جنبك يااستاذ  المهم يركب التلاته الباقيين والناس مزنقه في بعض مش قادره تستحمل  المهم بقي يبص وراه !  ويقول يااساتذه انا مش رايح اخر الخط انا رايح لنص الطريق بس !  المهم يتناقروا والناس في الاخر تمتثل للبيه عشان عايزين يوصلوا ولما ييجي نص الطريق  والناس تيجي تنزل  يقول اللي عايز يكمل بقي باجره تانيه  واللي مش عاجبه ينزل           عايز اعرف دي غلطته والا غلطه الناس اللي نصبته فرعون في لحظه ما  من اجل قضاء مصلحه ما وهي توصيلهم                                                                     فرعون اخر البيه اللي بيبيع العيش تلاقي الزحمة عنده جامده   والبياع واقف وتلاتين ايد ممدوداله بالفلوس  عشان تاخد عيش قبل اللي قدامهم او اللي جنبهم او اللي وراهم  وهو بقي بنظره فاحصه كانه خبير اثار اللي عينه تقع عليه كانه رضي عنه  واتفتحتله ابواب الفرن  ولو صوت الناس عالي شويه يشخط فيهم الامر الناهي يقوموا يخرسوا خالص  والسؤال هنا  ليه عدم الالتزام من الناس  وليه  البائع ده بقدره قادر تحول لفرعون في توقيت ما ولحظه ما من اجل الحصول علي  سلعه اي سلعه ؟ وفي كل مجال وكل مكان هتلاقي برضه فرعون طالما ليك مصلحه ما في وقت ما  وقد احس بائع الخدمه باحتياجك ليه مثلا ازمه انابيب او  لحوم او خضروات     لو تاملت الحكايه هتلاقي العالبيه العظمي من الناس او من شعبنا عنده استعداد للفرعنه يتفرعن يعني  !